हेटौंडा, राष्ट्रपति रनिङ शिल्ड बागमती प्रदेशस्तरीय खेलमा मकवानपुरले २ स्वर्ण जितेको छ । आइतबार भएको प्रतियोगितामा मकवानपुरले एथ्लेटिक्स विधामा २ स्वर्ण जित्न सफल भएको हो ।
ADVERTISEMENT
४ सय मिटर दौड प्रतियोगितामा मकवानपुरका आयुष नेगीले स्वर्ण जितेका छन् । यसैगरी १०० मिटर रिले दौड प्रतियोगितामा मकवानपुरका पाण्डेय राई, सुजन राई, सुमन योन्जन र आयुष नेगीले स्वर्ण जित्न सफल भएको जिल्ला खेलकुद विकास समिति मकवानपुरका कार्यालय प्रमुख माधव कोइरालाले जानकारी दिए । आइतबार भएको महिला तथा पुरुष कबडी प्रतियोगितामा मकवानपुरले पहिलो खेलमा जित हासिल गरेको छ ।
पुरुष खेलमा मकवानपुरले नुवाकोटलाई र महिलामा मकवानपुरले दोलखालाई पराजित गर्न सफल भयो । यसैगरी आइतबार भएको पुरुष भलिबल प्रतियोगितामा पनि मकवानपुरले पहिलो खेलमा विजयी हासिल गरेको छ । मकवानपुरले रसुवालाई २५–२० र २५–२४ को सोझो सेटमा पराजित गरेको हो । प्रदेशस्तरीय खेलमा मकवानपुर जिल्लाबाट ८४ जना खेलाडी सहभागी छन् ।
ADVERTISEMENT
जिल्लामा विजेता भएका खेलाडीलाई मकवानपुर जिल्ला खेलकुद विकास समितिले ५ दिन बन्दप्रशिक्षणको समेत व्यवस्था गरेको थियो ।
