हेटौंडा, मकवानपुर क्रिकेट संघले क्रिकेट एकेडेमी सञ्चालन गर्ने भएको छ । मकवानपुर जिल्लामा क्रिकेट खेलाडीहरु उत्पादन गर्ने उद्देश्यसहित क्रिकेट एकेडेमी सञ्चालन गर्न लागेको संघले जनाएको छ ।
ADVERTISEMENT
मासिक शुल्क कायम गरी महिला तथा पुरुष खेलाडीलाई हेटौंडाको हुप्राचौरमा प्रशिक्षण दिने उद्देश्यका साथ क्रिकेट एकेडेमी सञ्चालनमा ल्याउन लागेको मकवानपुर क्रिकेट संघका कार्यवहाक अध्यक्ष बिनोद बानियाँले जानकारी दिए । ‘संघको अनौपचारिक बैठक बसी क्रिकेट एकेडेमी सञ्चालन गर्ने निर्णय गरेतापनि यसलाई औपचारिक बैठक बसी पूर्णता दिने छौँ ’–उनले भने । संघको बैठक बसी मासिक शुल्क पछि तोकिने उनले जानकारी दिए ।
प्रशिक्षकको लागि क्रिकेटर तक्षक सिम्खडालाई तोकेको छ । यही बैशाख १० गते औपचारिक कार्यक्रमको आयोजना गरी क्रिकेट एकेडेमी सञ्चालन गर्ने प्रशिक्षक सिम्खडाले जानकारी दिए । क्रिकेट एकेडेमीले विभिन्न जिल्लामा रहेका एकेडेमी बिच खेलहरुको टुर्नामेन्ट गर्नुका साथै जिल्लामा हुने प्रतियोगितामा सहयोग पुग्ने बानियाँको भनाइ रहेको छ।
