‘लम्पी स्किन’ विरुद्ध सप्ताहव्यापी खोप अभियान सुरु

हेटौंडा, बागमती प्रदेशको कृषि तथा पशुपन्छी विकास मन्त्रालयले लम्पी स्किन रोग नियन्त्रण तथा रोकथामका लागि प्रदेशका १३ वटै जिल्लामा बिहीबारबाट सप्ताहव्यापी खोप अभियान सुरु भएको छ । गाई भैँसीमा पछिल्लो समय प्रकोपको रूपमा फैलिएको लम्पी स्किन रोगविरुद्ध अभियानअन्तर्गत प्रदेशका ९१ वटा स्थानीय तहमा ५० हजार पशुलाई खोप लगाउने लक्ष्य राखिएको छ ।

ADVERTISEMENT

विहीबारबाट सुरु भएको सप्ताहव्यापी खोप अभियान अन्तर्गत पहिलो दिनमै ४ हजार ४ सय ६७ पशुलाई खोप लगाइएको मन्त्रालयका सूचना अधिकारी अनुप अधिकारीले जानकारी दिए । जसमा २ हजार २२ गाई, ३६२ बाच्छा/बाच्छी, २६२ गोरु, १९६ साढेँ, ४७२ भैँसी, १२ राँगो र १४४ पाडापाडी रहेका छन् । मन्त्रालयका पशु विकास अधिकृत डा. निशान्त गेलालले बागमती प्रदेशमा हालसम्म दुई लाख चार हजार ९८८ पशु यो रोगबाट प्रभावित बनेको जानकारी दिए । उनले लम्पी स्किन रोगबाट सक्रिय सङ्क्रमित पशु एक लाख १० हजार ४४०, रोग लागेर मरेका छ हजार २९१ र खोप लगाइएका पशुको संख्या एक लाख ३२ हजार नौ सय रहेको बताए ।

मकवानपुरको मकवानपुरगढी गाउँपालिकाबाट सुरु भएको यो रोगबाट सबैभन्दा बढी काभ्रे, सिन्धुपाल्चोक, दोलखा र सिन्धुली जिल्ला भएका छन् । पशु विकास अधिकृत गेलालका अनुसार खोप अभियानअन्तर्गत १४६ जना भ्याक्सिनेटरद्वारा पशुलाई खोप लगाइने छ । अभियानका लागि ७५ लाख रुपियाँ विनियोजन गरिएको छ ।