हेटौँडा, भोलि विहीबारबारबाट छैठौं संस्करणको उपमेयर कप महिला तथा पुरुष भलिबल प्रतियोगिता हेटौंडामा शुरु हुँदैछ । मंसिर १४ गतेदेखि १७ गतेसम्म सञ्चालन हुने प्रतियोगिता हेटौँडा–१९, नेवारपानीमा सञ्चालन हुने छ ।
केशवलाल श्रेष्ठ स्मृति केन्द्रिय प्रतिष्ठान, मकवानपुर जिल्ला भलिबल संघ र हेटौंडा उपमहानगरपालिका भलिबल संघको संयुक्त आयोजना तथा मकवानपुर जिल्ला खेलकुद विकास समितिको सहकार्यमा प्रतियोगिता सञ्चालन हुन लागेको हो । पुरुष भलिबल प्रतियोगितामा हेटौंडाको १२ वटा वडाले सहभागिता जनाएको छ भने महिला भलिबल प्रतियोगितामा ७ वटा वडाको सहभागिता रहेको छ ।
पुरुष भलिबल प्रतियोगिताको उद्घाटन खेल वडा नम्वर १७ विरुद्ध वडा नम्वर १९ बीच हुनेछ भने महिला भलिबल प्रतियोगिता वडा नम्वर १४ विरुद्ध वडा नम्वर १२ बीच हुनेछ ।
प्रतियोगितामा प्रथम हुने विजेता टीमले ५० हजार रुपैयाँ, द्वितीय हुनेले ३० हजार रुपैयाँ र सान्त्वना हुनेले १० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै,उत्कृष्ट खेलाडीहरुका लागि पनि पुरस्कारको व्यवस्था गरिएका आयोजकले जनाएको छ ।
