हेटौंडा, हेटौंडा–४ मा रहेको नवोदय शिशु सदन अङ्ग्रेजी माध्यमिक विद्यालयको आयोजनामा नमूना संयुक्त राष्ट्र संघीय सभा आजबाट सुरु भएको छ । तीन दिनसम्म सञ्चालन हुने कार्यक्रममा विद्यार्थीलाई अन्तर्राष्ट्रिय संस्थाको अवधारणा बुझाउन अभ्यासमा आधारित भई कार्य गरिने छ ।
नमूना संयुक्त राष्ट्र संघीय सभाकी महासचिव रेजा बिष्टको अध्यक्षतामा भएको कार्यक्रममा हेटौंडा उपमहानगरपालिका शिक्षा महाशाखाका प्रमुख गंगाधर रिमालले उद्घाटन गरेका हुन् । कार्यक्रममा बोल्दै रिमालले शैक्षिक सिकाइसँगै अतिरिक्त क्रियाकलापले विद्यार्थीमा सिर्जनशील क्षेमताको विकासमा सहयोग पु¥याउनेमा जोड दिए । नवोदय विद्यालयले आयोजना गरेको नमूना संयुक्त राष्ट्र संघीय कार्यक्रमले प्रविधिमैत्री, अनुसन्धनात्मक सिकाइको विकास हुने रिमालले बताए ।
यसैगरी प्याव्सन मकवानपुरका अध्यक्ष बिनोद सुवेदीले नमूना संयुक्त राष्ट्र संघीय सभा कार्यक्रमले विद्यार्थीको तार्किक क्षेमता, नेतृत्व विकासमा सहयोग पुग्ने बताएका छन् । ‘विद्यार्थीहरुले विभिन्न एजेन्डामा रही छलफल हुने भएकोले गर्दा प्यानल छलफलबाट निश्कर्ष निकाल्न मद्दत मिल्दछ ।’ उनले भने –‘छलफलबाट एउटा कार्यपत्र निर्माण हुन्छ । निर्माण भएको कार्यपत्र हेटौंडा उपमहानगरपालिकामा बुझाउनुहोस् ।’
नवोदय विद्यालय व्यवस्थापन समितिका अध्यक्ष पुरनबहादुर जोशीले संयुक्त राष्ट्र संघको चुनौती र अवधारणाको बारेमा विद्यार्थीसमक्ष प्रस्तुत गरेका थिए । ‘एक व्यक्तिले एक रुख रोप्नु पर्छ।’ जोशीले भने –‘एक व्यक्तिले एक रुख नरोपेमा मानव जाती नै सखाप हुनेछ ।’ नमूना महासभामा विश्व स्वास्थ्य संगठन, संयुक्त राष्ट्रसंघीय सुरक्षा परिषद्, आर्थिक र वित्तीय मामिला परिषद्, खाद्य तथा कृषि संगठन, अन्तर्राष्ट्रिय श्रम संगठन, संयुक्त राष्ट्रसंघीय पर्यावरणलाई प्रमुख एजेन्डामा रही छलफल गर्नेछन् । नमूना महासभामा सहभागी हुँदा विद्यार्थीले कुटनीति, अन्तर्राष्ट्रिय सम्बन्ध र राष्ट्रसंघमा मुलुकको प्रतिनिधित्वका विषयमा बुझ्न पाउनेछन् ।
नमूना महासभा बैठकका साथै सामाजिक सन्ध्या तथा विविध मनोरञ्जनात्मक क्रियाकलापको पनि आयोजना हुनेछ । नमूना महासभामा हेटौंडा एकेडेमी विद्यालय, तुलसी मेहर विद्यालय, बालजागृति इंग्लिस सेकेण्डरी स्कूल, मकवानपुर बाल विद्या सदन, ब्रहमदिक एकेडेमीका विद्याथीको सहभागिता रहेको छ । कार्यक्रममा संयुक्त राष्ट्र संघीय विकास कार्यक्रम मकवानपुरका सन्तोष कर्ण, हेटौंडा ४ नम्वर वडा अध्यक्ष नवीन सिग्देललगायतको आतिथ्यता रहेको थियो ।
