हेटौंडा, दलित महिला संघ फेडोले हेटौंडामा लैङ्गिक समानता र जातीय विभेद विरुद्ध पुरुष संलग्नता सम्बन्धि अभिमुखीकरणको आयोजना गरेको छ ।
ADVERTISEMENT
नेपालमा दलित महिला तथा किशोरीको मानव अधिकार प्रवद्र्धन परियोजना अन्तर्गत शनिबार हेटौंडामा अभिमुखीकरणको आयोजना गरेको हो । फाउन्डेसन फर अ जस्ट सोसाइटीको सहयोगमा भएको कार्यक्रममा दलित महिला अभियानकर्ताको जोडी र अन्य विभिन्न सरोकारवालाको सहभागिता रहेको थियो ।
फेडो मकवानपुरका उपाध्यक्ष एवम् जिल्ला समन्वय समिति मकवानपुरका सदस्य सुनिता दर्नालले कार्यक्रमको उद्घाटन गरेकी हुन् । दर्नालले अहिले पनि नेपाली समाजमा लैङ्गिक असमानता र जातीय विभेद कायमै रहेको उल्लेख गर्दै यसको अन्त्यका लागि सबैको सकारात्मक सहयोग जरुरी रहेको औंल्याइन् । पछिल्लो समय जातीय विभेद र लैङ्गिक असमानताका घटना कमी हुँदै गएपनि अन्त्य भने नभएको उनको भनाई थियो ।
दलित महिला संघले यस परियोजना अन्तर्गत हेटौंडा उपमहानगरपालिका र बकैया गाउँपालिकालाई कार्यक्षेत्र बनाएर काम गर्दै आइरहेको छ । सचिव मन्जु रोक्काले स्वागत मन्तव्य व्यक्त गर्दै यस्ता अभिमुखीकरणले जातीय विभेद अन्त्यका लागि सघाउ पुग्ने विश्वास व्यक्त गरिन् ।
कार्यक्रममा प्रशिक्षक राजबहादुर गिरीले सहजीकरण गरेका थिए । कार्यक्रममा फेडोका परियोजना संयोजक विमला विश्वकर्मा, सामाजिक सहजकर्ता राधिका सुनार लगायतको उपस्थिती थियो ।
