हेटौंडा, ३१ औँ पारिजात स्मृति दिवसको अवसरमा साहित्य सङ्गम मकवानपुरले बुधबार विशेष कार्यक्रमको आयोजना गरेको छ । हेटौंडा १० बसपार्कमा रहेको पारिजातको प्रतिमामा माल्यार्पण गर्नुका साथै पारिजात स्मृति सम्मान पनि प्रदान गरेको छ ।
ADVERTISEMENT
साहित्य सङ्गम मकवानपुरका अध्यक्ष डीबी बर्तौलाको सभाध्यक्षता तथा हेटौंडा उपमहानगरपालिका वडा नम्वर १० का वडा अध्यक्ष फुर्वा लामाको प्रमुख आतिथ्यता रहेको थियो । कार्यक्रममा पारिजात स्मृति केन्द्रका पूर्व अध्यक्ष तथा अग्रज साहित्यकार डा.महेश मास्केज्यूलाई नगद १५ हजार ५ सय ५५ रुपैयाँसहित पारिजात स्मृति सम्मान प्रदान गरेको छ । मास्केले सम्मानित रकम र त्यति नै रकम थपेर ३१ हजार १ सय १० रुपैयाँ सङ्गमको अक्षयकोष निर्माणमा सहयोग गरेका छन् ।
सर्जक सञ्जाल मकवानपुरका अध्यक्ष निमेष निखिलले सम्मानित श्रष्टाका व्यक्तित्व र कृतित्वमाथि प्रकाश पारेका थिए । कार्यक्रममा साहित्यकार जनार्दन खनाल, भवानी तिमल्सिना र रजनी पौडेलले पारिजातसम्बन्धि कविता वाचन गरेका थिए । कार्यक्रममा मदन भण्डारी स्वास्थ्य प्रतिष्ठानका उपकूलपति विश्वराज जोशी, प्रज्ञा प्रतिष्ठान काव्य विभागकी सदस्य शान्तिप्रिय वन्दनालगायतको आतिथ्यता रहेको थियो ।
