वैशाख २४ गते सार्वजनिक विदा दिने बागमती सरकारको निर्णय

हेटौंडा, बागमती प्रदेश सरकारले यही वैशाख २४ गते सार्वजनिक विदा दिने निर्णय गरेको छ ।

प्रदेशको बुधबार बसेको मन्त्रिपरिषद् बैठकले प्रदेश सरकारी कामकाजी भाषा ऐन २०८० कार्यान्वयन भएको अवसरमा उक्त दिन सार्वजनिक विदा दिने निर्णय गरेको हो ।

प्रदेशका नागरिकहरूमा संस्कृति र पहिचानको अपनत्व महसुस गराउन ऐन कार्यान्वयन हुने दिनमा विदा दिइएको प्रदेश सरकारका प्रवक्ता गङ्गा नारायण श्रेष्ठले बताए ।

गत कात्तिक २३ मा जारी गरिएको उक्त ऐनमा भएको व्यवस्था अनुसार वैशाख २४ गते कार्यान्वयन हुने भनिएको छ ।

सो ऐनको राजपत्रमा प्रकाशित भएको १८० दिनमा कार्यान्वयन हुने प्रस्तावनामा उल्लेख गरिए बमोजिम प्रदेश सरकारले अघि बढाएको हो ।पहिलो चरणमा सरकारी निकाय र स्थानीय तहको बोर्ड र लेटर हेडमा नेपाली भाषा सहित तामाङ र नेपाल भाषाका उल्लेख गरिने मन्त्री श्रेष्ठको भनाई छ ।