अदालतको आदेश मिचेर फलामे बार, स्थानीय आन्दोलित

हेटौंडा, हेटौंडा– १० सिमाचोकबाट टिसिएन रोडतर्फ निस्कने सडकको दायाँबायाँ फलामे बार निर्माण कार्य रोक्न स्थानीय घरधनी तथा व्यावसायीहरुले माग गरेका छन् ।

उच्च अदालत पाटन, हेटौंडा इजलासले उक्त क्षेत्रमा फलामे बार निर्माणको काम तत्कालका लागि रोक्न अल्पकालिन अन्तरिम आदेश जारी गरेको भएतापनि वडा कार्यालयले निर्माण कार्यलाई निरन्तरता दिँदा स्थानीय आन्दोलित बनेका हुन् ।

उच्च अदालत पाटन, हेटौंडा इजलासका न्यायाधीश मिना गौतम सेडाईँको एक्कल इजलासले शुक्रबार जेष्ठ २३ गतेसम्म निवदेकहरुको जग्गा तथा घरमा प्रवेश गर्न असर पर्ने गरी फलामको पोल, फलामको रेलिङ्ग लगाउने कार्य नगर्न नगराउन अल्पकालिन अन्तरिम आदेश जारी गरेको थियो ।

अदालतको आदेशको अवहेलना गर्दै वडा कार्यालयले प्रहरी परिचालन गरी निर्माण कार्यलाई निरन्तरता दिएपछि स्थानीय दुई दर्जनभन्दा बढी घरधनीहरुले आज संयुक्त रुपमा पत्रकार सम्मेलन गरी निर्माण कार्य रोक्न सम्बन्धित निकायको ध्यानाकर्षण गराएका छन् ।

गत मंगलबार १० नम्वर वडा कार्यालयले सो सडकको किनारमा फलामे बार राख्ने काम सुरु गरेको हो । स्थानीयहरुले फलामे बार निर्माण गर्दा आफ्नो घर भित्र छिर्ने बाटो नै अवरुद्ध हुने र पसल व्यावसायमा समेत असर पुग्ने भन्दै अदालतमा रिट निवेदन दर्ता गराएका थिए ।

स्थानीय गोपाल श्रेष्ठले दिएको रिट निवेदनमाथि अदालतले २३ गतेसम्म काम नगर्न, नगराउन अल्पकालिन आदेश दिएको थियो ।

कानूनी राज्यमा कानूनको उल्लङ्घन भएको भन्दै स्थानीयहरुले गुनासो गरेका छन् । उनीहरुले कुनै पनि निर्माण कार्य अघि बढाउँदा स्थानीय जनताको सहमति लिएर मात्रै गर्नुपर्ने माग राखेका छन् । साथै कुनै सूचना, टेन्डर, तथा कोर्टेशन ननिकाली टिसिएन रोड क्षेत्रको आवश्यकता विपरित बजेट दुरुपयोग गर्ने उद्देश्यका साथ वडा कार्यालयले फलामे बार निर्माण गरेको आरोप लगाएका छन् ।