फागुन ३ गतेबाट बागमती गोल्डकप फुटबल प्रतियोगिता

हेटौंडा, सातौं संस्करणको बागमती गोल्डकप राष्ट्रिय फुटबल प्रतियोगिता फागुन ३ गतेदेखि हुने भएको छ । सोमबार पत्रकार सम्मेलन गर्दै बागमती गाउँपालिका खेलकुद विकास समितिले फागुन १ गतेदेखि गर्ने भनिएको प्रतियोगिता फागुन ३ गतेदेखि १२ गतेसम्म गर्न लागिएको जानकारी दिएको हो ।

ए डिभिजनका ७, मोफसलका ३ टिमको सहभागिता रहेको प्रतियोगिता बागमती गाउँपालिका–४ झुरझुरेस्थित सहिद स्मृति रंगशालामा हुने समितिका अध्यक्ष रहरसिंह थिङले जानकारी दिए ।

यसअघिका संस्करण जनता मावि फापरबारीमा हुँदै आएको थियो । प्रतियोगिताको उपाधि विजेता टिमले नगद १० लाख रुपैयाँ र उपविजेता टिमले ५ लाख रुपैयाँसहित शिल्ड, मेडल, र प्रमाणपत्र प्रदान गरिने छ।

यस्तै सर्वोत्कृष्ट खेलाडीलाई १ लाख १ हजार रुपैयाँ, विधागत उत्कृष्ट खेलाडीलाई जनही २५ हजार रुपैयाँ, र प्रत्येक खेलका म्यान अफ दी म्याचलाई १० हजार रुपैयाँसहित शिल्ड प्रदान गरिनेछ। गत वर्षको संस्करण मछिन्द्र क्लबले जितेको थियो ।