हेटौँडा, बागमती प्रदेशसभामा लामो समयदेखि विवादित बनेको चिट्ठा विधेयक सम्बन्धी प्रतिवेदन पेस गरिएको छ । आइतबार बसेको प्रदेशसभा बैठकमा प्रदेश मामिला समितिका सभापति छिरिङदोर्जे लामाले ‘प्रदेशस्तरको चिट्ठा व्यवस्थापन तथा नियन्त्रण गर्ने सम्बन्धमा व्यवस्था गर्न बनेको विधेयक’ सम्बन्धी समितिको प्रतिवेदन प्रस्तुत गर्नुभयो। समितिमा दफावार छलफल र आवश्यक संशोधनपछि पारित भएको उक्त प्रतिवेदन अब आगामी बैठकमा छलफलमा प्रवेश गर्नेछ ।
ADVERTISEMENT
यसअघि, २०८० वैशाख १२ गते बसेको प्रदेशसभा बैठकले सो विधेयक पारित गरी प्रमाणीकरणका लागि तत्कालीन प्रदेश प्रमुख यादवचन्द्र शर्मासमक्ष पठाएको थियो । तर प्रमुख शर्माले विधेयकमा गम्भीर त्रुटि रहेको भन्दै २०८० जेठ ७ गते फिर्ता पठाउनुभएको थियो ।
पछिल्लो पटक २०८२ जेठ ८ गते बसेको बैठकले विधेयकलाई दफावार छलफल र संशोधनका लागि समितिमा पठाएको थियो । यसअघि पनि उक्त विधेयक संसदमा प्रस्तुत गर्ने प्रयास भए पनि ‘कालो धनलाई सेतो बनाउन सहयोग पुग्ने खालको व्यवस्था गरिएको’ भन्ने आरोपपछि सरकार पछि हटेको थियो ।
२०८० असोज १५ गते बसेको प्रदेशसभा बैठकमा विधेयक पुनर्विचारका लागि ‘चोर बाटो’ प्रयोग गरी प्रस्तुत गर्न खोज्दा तत्कालीन प्रमुख प्रतिपक्ष दल नेकपा ९एमाले० का सांसदहरूले रोष्टम घेराउ गर्दै कडा विरोध जनाएका थिए । त्यसपछि केही समय विधेयक रोकिएको थियो ।
हाल भने एमालेको सहमतिमा विधेयक अघि बढाइएको हो । यसअघि माओवादी नेतृत्वमा समितिमा प्रवेश पाएको सो विधेयक २०८० वैशाख १२ गते एकै दिन संसदमा पेस गरेर पारित गरिएको थियो ।
