हेटौंडा, आज सोमबार उदाउँदो सूर्यलाई पूजाआजा सहित अर्घ दिएर यस बर्षको छठ पर्व सम्पन्न भएको छ । कार्तिक शुक्ल चतुर्थीदेखि सप्तमीसम्म मनाइने पर्वको मुख्य दिन आइतबार अस्ताउँदो सूर्यलाई पूजाआजा सहित अर्घ दिइएको थियो । छठ पूजा समारोह समितिको आयोजनामा हेटौंडामा पनि छठ पूजाको आयोजना भएको छ ।
ADVERTISEMENT
हेटौंडाको राप्तीतट सिंगारिएको थियो । छठ पूजा गर्न तथा अवलोकन गर्न सर्वसाधारणको घुइँचो लागेको थियो । परम्परानुसार छठका दिन साँझ अस्ताउँदो सूर्यलाई जलाशयमा उभिएर पूजाका लागि राखिएका उखु, केरा, नरिवल, सुठुनी, निम्बु, पान, सुपारी, सिन्दुर, बेसार, अदुवा, नरिवल, केराउ, भुसुवा, ठेकुवा, फलफूल, मिठाइलगायत सामग्रीका साथ अर्घ दिइएको छ । सम्पूर्ण प्राणीलाई विना भेदभाव समान शक्ति, ताप र किरण दिने समानताको प्रतीक सूर्यको यसै महिमालाई आत्मसात् गर्दै सूर्यको पूजा प्रार्थना र आराधना तनमन लगाएर चार दिनसम्म गरिएको छ ।
सामग्रीलाई अर्घ दिएपछि रातभर नदी, पोखरी तथा तलाउ किनारमा सबै श्रद्धालु बसी रमाइलो गर्दै छठको लोकगीत गाउने प्रचललन समेत रहेको छ । पवित्र मनले छठ मनाउँदा पारिवारिक कल्याण, सन्तान सुख तथा मनोकामना पूरा हुने विश्वास रहेको छ । राप्तीतटमा पूजा गर्ने भक्तजनहरु करिव ५ सयको हाराहारीमा उपस्थित भएको दावी गरिएको छ । ६०० सय फिटको टेण्ट लगाएर ३० वटा ठाउँमा भक्तजनहरुले सामूहिक पूजा गर्ने व्यवस्था मिलाइएको थियो ।
हेटौंडाको राप्तीमा मनाइएको छठ पर्वका अवसरमा आसन्न प्रतिनिधिसभा तथा प्रदेशसभा निर्वाचनको लागि उम्मेदवारहरु समेत राप्ती तट पुगेका थिए ।
