बिर्खे अन्जानको ‘कठघरामा देश’ विमोचन

हेटौंडा, मुक्तककार बिर्खे अन्जानको मुक्तक संग्रह ‘कठघरामा देश’ शुक्रबार विमोचन भएको छ । मुक्तक मञ्च मकवानपुरको आयोजनामा शुक्रबार साहित्य संगमको सभाहलमा मुक्तक संग्रह विमोचन गरिएको हो । मुक्तक वाचन नवौँ शृंखला अन्तर्गत मुक्तक मञ्च मकवानपुरका अध्यक्ष डीबी बर्ताैलाको सभाध्यक्ष तथा रौतहटका वरिष्ठ मुक्तककार हरिकृष्ण काÇलेको प्रमुख आतिथ्यमा कृति विमोचन भएको हो ।

समीक्षक तथा मुक्तककार विश्वनाथ सञ्जेलले बिर्खे अन्जानलाई विद्रोही चेत र भुइँमान्छेको विषयलाई उठान गर्ने मुक्तककारको रुपमा परिचित गराएका थिए ।

शल्यक्रिया पहिलो कृति भएपनि मुक्तक संग्रहमा कठघरामा देश पहिलो कृति भएको उनले बताए । कार्यक्रममा सागर तिमल्सिना, सुवास सजललगायतले अन्जानका मुक्तक वाचन गरेका थिए । कार्यक्रममा सर्जक सञ्जाल मकवानपुरका अध्यक्ष निमेष निखिललगायतको आतिथ्यता रहेको थियो ।