हेटौंडा, मकवानपुर क्रिकेट संघको आयोजनामा हुन लागेको दोस्रो स्वर्गीय निरज स्मृति विद्यालय स्तरीय टि २० क्रिकेट प्रतियोगितामा मकवानपुरका १३ वटा विद्यालयले सहभागिता जनाएका छन् ।
ADVERTISEMENT
माघ २३ गतेबाट शुरु हुने प्रतियोगितामा मकवानपुरका तीन वटा सामूदायिक विद्यालय र १० वटा संस्थागत विद्यालयले सहभागिता जनाएको कार्यक्रम संयोजक संजोग पोखरेलले जानकारी दिए । मकवानपुर क्रिकेट संघले जारी गरेको सूचना अनुसार प्रतियोगिताको लागि टिम दर्ता गर्नुपर्ने अन्तिम मिति माघ १९ गते रहेको थियो ।
प्रतियोगितामा सामूदायिक विद्यालयतर्फ भूटनदेवी माध्यमिक विद्यालय, आधुनिक राष्ट्रिय माध्यमिक विद्यालय र मकवानपुरगढीमा रहेको भानु माध्यमिक विद्यालयले सहभागिता जनाएका छन् । यसैगरी संस्थागत विद्यालयतर्फ सिद्धार्थ शिशु सदन, सोलिड्यारिटी इन्टरनेशनल एकेडेमी, ज्ञानोदय एकेडेमी, नवोदय शिशु सदन, बालजागृति सेकेण्डरी विद्यालय, जीएस निकेतन, तुल्सी मेहर मेमोरियल विद्यालय, हेटौंडा एकेडेमी, कमाने एकेडेमी र जेनिथ इन्टरनेशल विद्यालय रहेका छन् ।
माघ २१ गते पत्रकार सम्मेलनको आयोजना गरी प्रतियोगिताको लागि खेल तालिका सार्वजनिक गर्ने उनले बताए । प्रतियोगितामा प्रथम र दोस्रो हुने टिमलाई क्रमशः नगद ४० हजार र २० हजार रुपैयाँसहित शिल्ड, मेडल र प्रमाणपत्र प्रदान गरिने छ । प्रतियोगितामा म्यान अफ द सिरिजलाई ५ हजार, बेष्ट बलर/बेष्ट ब्याटसम्यानलाई जनही ३ हजाररुपैयाँसहित ट्रफी र प्रमाणपत्र, म्यान अफ द म्याचलाई ट्रफी र एक सेट खाजाको कुपन, टुर्नामेन्टमा सबैभन्दा बढी छक्का हान्नेलाई ३ हजार रुपैयाँ, प्रथम ह्याट्रिक गर्नेलाई ५ हजार रुपैयाँ प्रदान गरिने भएको छ ।
प्रतियोगिताको लागि प्रथम पुरस्कार रुपक मानन्धरले र दोस्रो पुरस्कार महारत बज्राचार्यले प्रायोजन गरेका हुन् । प्रतियोगितामा उत्कृष्ट प्रदर्शन गर्ने खेलाडीहरु छनौट गरि अण्डर १६ जिल्ला टिम निर्माण गरी प्रशिक्षण गराउने क्यान मकवानपुरका अध्यक्ष करन महत्रा क्षेत्रीले बताए । मकवानपुर क्रिकेट टिमका पूर्व कप्तान समेत रहेका श्रेष्ठ ब्लड क्यान्सरबाट मृत्यु भएका थिए ।
