हेटौंडा/राष्ट्रपति शौक्षिक सुधार कार्यक्रमको लागि मकवानपुरका १७ वटा विद्यालय छनौट भएका छन् । शिक्षा, विज्ञान तथा प्रविधी मन्त्रालयले सार्वजनिक गरेको ३ हजार ४७५ विद्यालय छनौट हुँदा मकवानपुरका १७ वटा विद्यालय छनौमा परेका हुन् । छनौट भएका मध्ये १४ वटा विद्यालयले सुचना प्रविधि प्रयोगशाला (आईसिटी) निर्माण गर्न ६ लाख ५० हजारका दरले अनुदान प्राप्त गर्ने भएका छन् । त्यस्तै ३ वटा विद्यालयले चार कोठे भवन निर्माणको लागि ४५ लाखका दरले अनुदान प्राप्त गर्ने भएका छन् । छनोट भएका सबैभन्दा बढी हेटौंडा उपमहानगरपालिकाको पाँच वटा विद्यालय रहेका छन् ।
ADVERTISEMENT
जसमा राजदेवी माध्यमिक, त्रिभुवन माध्यमिक, अरनिको आधारभुत, शंकरज्योती आधारभुत र आधारभूत विद्यालय कमाने भोर्ले रहेका छन् । त्यस्तै राक्सिराङको कालिका र देवीका आधारभूत, बकैयाको जनक माध्यमिक र बाघभैरव आधारभूत, मकवानपुरगढीको रानिसेरा र चण्डिका माध्यमिक, बागमतीको विष्णु र चौरा आधारभूत, मनहरीको जनज्योती आधारभुत र जनजिवन ज्योती माध्यमिक, इन्द्रसरोबरको बत्सलादेवि माध्यमिक, भिमफेदीको बाराही माध्यमिक विद्यालय छनौट भएका छन् ।
मकवानपुरमा रहेका थाहा नगरपालिका र कैलाश गाउँपालिकाको कुनै पनि विद्यालय छनौटमा परेका छैनन। राष्ट्रपति शौक्षिक सुधार कार्यक्रम अन्तर्गत भौतिक सुविधा विस्तार लगायतका कार्यक्रममा सहभागी हुने विद्यालयले स्थानीय तह मार्फत शिक्षा तथा मानव स्रोत केन्द्रमा प्रस्ताव पेश गरेका थिए । ‘राष्ट्रपति शौक्षिक सुधार कार्यक्रम कार्यान्वयन कार्यविधि, २०७६’ निर्देशक समितिको बैठकले यो कार्यक्रम चालु आर्थिक वर्ष २०७९/८० मा साउनबाट नै कार्यन्वयन गर्ने प्रस्ताव गरेको थियो ।
कार्यक्रम कार्यान्वयनका लागि सरकारले बजेट भाषण मार्फत चालु शैक्षिक वर्ष (आर्थिक वर्ष) का लागि ८ अर्ब ८८ करोड रुपियाँ बजेट विनियोजन गरेको छ । गत वर्षको ७ अर्ब ८५ करोड ५१ लाख रुपियाँ छुट्याएको थियो ।
