जनप्रिय विद्यालय कक्षा ११ मा विज्ञान संकाय पढाइ हुने

हेटौंडा, मकवानपुर जिल्लामा प्राविधिक शिक्षालयलाई जोड दिँदै आईरहेको जनप्रिय माध्यमिक विद्यालय (प्राविधिक शिक्षालय) हेटौंडा–१६ ले यसै शैक्षिक सत्रबाट कक्षा ११ मा विज्ञान संकाय थप गरि पढाई सुरु गर्ने भएको छ । जिल्लाको पहिलो नमूना विद्यालय र जिल्लाको पहिलो प्राविधिक शिक्षालय भएकोले गर्दा यसवर्षबाट विज्ञान संकायको पढाई सुरु गर्न लागेको विद्यालयका प्रिन्सिपल भुपेन्द्र चौलागाईंले जानकारी दिए ।

‘ग्रामीण परिवेशका विद्यार्थीहरुलाई विज्ञान विषय पढ्नको लागि बजारमा कोठा लिएर बस्नुपर्ने र भाडा तिरेर बजार जानुपर्ने समस्यालाई न्यूनीकरण गर्ने उद्देश्यले विज्ञान संकाय सञ्चालन गर्न लागेका छौँ ।’ उनले भने –‘जनप्रिय विद्यालय नमूना विद्यालय भएको र सम्पूर्ण विद्यार्थीलाई समेट्न सक्ने खालको धार सञ्चालन गर्नुपर्छ भन्ने मापदण्डसहित विज्ञान संकायको पढाई सुरु गर्न लागेका हौँ। साथै विद्यालयले प्राविधिक धारका कक्षाहरु पनि सञ्चालन गरिरहेको छ ।’

‘विज्ञान संकायको कक्षा अत्यन्त न्यून शुल्कमा सञ्चालन गर्न लागेका छौँ । पहिलो वर्ष हामीले भर्ना शुल्कमात्र लिएर कक्षा सञ्चालन गर्ने छौँ । ’ सत्मार्ग अनलाइनसँग उनले भने –‘प्रयोगशाला र अन्य मर्मत सम्भारका लागि विद्यालय आफैँले खर्चको व्यवस्थापन गर्ने छ । स्थानीय सरकारबाट सहुलियत पाएमा सहुलियतका कार्यक्रमहरु पनि सञ्चालन गरिने छ।’

यता विज्ञान विषय अध्ययनको लागि हेटौंडा उपमहानगरपालिका १६ नम्वर वडा कार्यालयले स्थायी विद्यार्थीहरुलाई निशुल्क छात्रवृत्ति दिने निर्णय गरेको छ भने आर्थिक अभाव भई विज्ञान विषय पढ्न वन्जित विद्यार्थीहरुलाई निःशुल्क पढ्ने व्यवस्था मिलाइदिएको छ ।

पहिलो वर्ष सञ्चालन हुन लागेको विज्ञान संकायमा १० देखि १५ जना विद्यार्थी भर्ना हुने अपेक्षा लिएको प्रिन्सिपल चौलागाईंले बताए । अहिले विद्यालयमा २ हजार विद्यार्थी अध्ययनरत रहेका छन् । ३ सय जना नयाँ विद्यार्थीहरू यसै वर्ष कक्षा १ देखि ९ सम्म भर्ना भएको उनले जानकारी दिए । जनप्रिय माध्यमिक विद्यालय (प्राविधिक शिक्षालय) मा अध्ययनरत विद्यार्थी कक्षामा पढ्दै र खेतबारीमा अभ्यास गर्दै आम्दानी पनि गर्दै आईरहेका छन् ।