हेटौँडा, बागमती प्रदेश सभाले दुई महत्त्वपूर्ण विधेयकलाई दफावार छलफलका लागि विषयगत समितिमा पठाउने प्रस्ताव सर्वसम्मत रूपमा पारित गरेको छ। आइतबार बसेको प्रदेश सभा बैठकले प्रदेशको आर्थिक अनुशासन र सेवा प्रवाहसँग प्रत्यक्ष सरोकार राख्ने दुई विधेयकलाई थप अध्ययन तथा परिमार्जनका लागि समितिमा पठाउने निर्णय गरेको हो।
ADVERTISEMENT
बैठकले आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयक र प्रदेश खानेपानी तथा सरसफाइ सम्बन्धमा व्यवस्था गर्न बनेको विधेयक लाई प्रदेश सभाको अर्थ तथा विकास समितिमा पठाउने निर्णय गरेको हो। अब समितिले दुवै विधेयकका प्रावधानमाथि दफावार छलफल गर्दै सरोकारवाला निकायसँग परामर्श गरी आवश्यक संशोधनसहित प्रतिवेदन तयार पार्नेछ।
बैठकमा आर्थिक मामिला तथा योजनामन्त्री प्रभात तामाङले आर्थिक कार्यविधिसम्बन्धी विधेयकलाई समितिमा पठाउने प्रस्ताव प्रस्तुत गरेका थिए। उनले प्रदेशको वित्तीय अनुशासन, पारदर्शिता तथा उत्तरदायित्व सुनिश्चित गर्न उक्त विधेयक आवश्यक रहेको बताएका थिए।
त्यस्तै, खानेपानी, ऊर्जा तथा सिँचाइमन्त्री कृष्णकुमार तामाङले खानेपानी तथा सरसफाइसम्बन्धी विधेयकलाई दफावार छलफलका लागि समितिमा पठाउने प्रस्ताव राखेका थिए। उनले प्रदेशभर स्वच्छ खानेपानीको पहुँच विस्तार तथा सरसफाइ व्यवस्थापनलाई संस्थागत गर्न उक्त विधेयक महत्त्वपूर्ण हुने धारणा व्यक्त गरे।
मन्त्रीद्वयले प्रस्तुत गरेका प्रस्तावलाई प्रदेश सभाकी उपसभामुख अप्सरा चापागाईंले निर्णयार्थ प्रस्तुत गरेकी थिइन्। सभामा उपस्थित सदस्यहरूले दुवै प्रस्ताव सर्वसम्मत रूपमा पारित गरेका हुन्।
अब ती विधेयकहरूमाथि अर्थ तथा विकास समितिमा विस्तृत छलफल हुने भएको छ। समितिले प्राप्त सुझाव, संशोधन प्रस्ताव तथा आवश्यक परिमार्जन समेटेर प्रतिवेदन तयार गरी पुनः प्रदेश सभामा पेश गर्नेछ।
प्रदेश सभाको बैठक अर्को सूचना नभएसम्मका लागि स्थगित गरिएको छ।
